LONDEN – E tenista kurasoleño Jean-Julien Rojer, ku na Weganan Olímpiko na Londen ta sali pa Hulanda, awe huntu ku su partner tenista Robin Haase a keda eliminá den e promé ronda di e torneo di tènes dòbel.

E duo a pèrdè den tres set di Vishnu Vardan i Leander Paes di India: 6-7 (4), 6-4, 2-6. Haase i Rojer den e di dos set a perdè un bentaha di break, pero tòg a gana e set. Despues a bai malu den e di seis game riba un service di Rojer. Djis despues di esaki Paes i Vardan a kue nan chèns riba e prome punto di wega.

E pèrdida di e wega dòbel ta nifiká ku no tin hulandes mas aktivo den e torneo na e kanchanan di tènes na Wimbledon.