WILLEMSTAD - “E echo ku Eugene Cleopa di partido MAN ofisialmente a postulá su mes komo parlamentario independiente lo no tin influensha riba funshonamentu di parlamentu”. Asina Ivar Asjes, presidente di Staten, a duna di konosé.

Pa loke ta e pregunta si gabinete Schotte tin sostén di parlamentu si of no, Asjes a bisa ku esaki solamente lo por keda determiná durante un reunion di parlamentu a base di votashon di tur e 21 miembronan. Tantén ku esaki no keda ekspresá no por bisa ku e gobièrnu aktual no tin sostén di parlamentu mas.

Silensio hermétiko
Di parti di gobièrnu més tin un silensio hermétiko pa loke ta futuro di gabinete Schotte awor ku a bira konosí ku no por konta mas ku e asiento di Eugene Cleopa. E frakshon di Frente Obrero i Liberashon 30 di mei ku un asiento den Parlamentu ta wòrdu mirá komo e solushon mas víabel pa kontinuashon di gabinete Schotte. Un otro posibilidat ta e frakshon di Partido Nashonal di Pueblo, ku tambe tin un asiento, ounke esaki ta menos probabel.