WILLEMSTAD – Èks promé minister Emily de Jongh-Elhage segun enkargo di partido di oposishon PAR a manda gobernador Frits Goedgedrag un karta kaminda e ta puntra ta dikon ainda Schotte no a entregá retiru di su gabinete.

“Kada promé minister ku ta respetá su mes i pueblo lo mester informá gobernador ku e no por konta mas ku sosten di parlamento i ofresé gobernador su retiru”, tin pará den e karta kaminda di paso e ta yama Schotte un gañadó. E ta pidi gobernador pa vigilá pa gobièrnu no tuma desishon mas.

Na nòmber di frakshon di PAR a sali un karta pa presidente di Staten Ivas Asjes tambe, ku e petishon pa yama un reunion públiko di Staten “pa duna pueblo di Kòrsou klaridat tokante e situashon inakseptabel ku a surgi”.

Un ke otro ta konsekuensha di karta i ponensha di miembronan di Staten Cleopa (MAN) i Rozier (MFK) ku a retirá nan konfiansa den gabinete Schotte. Ku esaki e koalishon di gobièrnu a pèrdè su mayoria den Staten. Sin embargo promé minister Schotte no a ofresé su retiro ainda.