WILLEMSTAD – E aktor hulandes Jeroen Krabbé a firma pa e parti di gobernador De Veer den Tula, the Revolt, e sine di e lider di e rebelion grandi di katibu di 1795, ku lo filma for di òktober na Kòrsou.

Gobernador De Veer ta un di e partinan prinsipal di e sine. Tempu di e rebelion ta e tabata manda riba e isla.

Anteriormente Krabbé a hunga un gran kantidat di otro ròl manera den Soldaat van Oranje, De Vierde Man i algun sine di Hollywood manera The Prince of Tides i The Fugitive. El a dirigí Left Luggage i The Discovery of Heaven.

Partisipashon di e otro partinan
E casting pa Tula, the Revolt ta den ful suin. Ta buska aktor na Kòrsou, Hulanda, Inglatera i Estádos Unídos.

E casting internashonal ta den man di Jeremy Zimmermann na Londen. E siman ku ta bini ta ferwagt e promé proposishonnan.

Na Kòrsou mes e promé ronda di casting a kaba di pasa. Lo invitá diferente aktor pa un di dos ronda di selekshon ku lo tuma lugá aki dos siman.